Cafougnette etoué al plache sou le flingue. IL relucke sé cartes et ravisse eune pair ed Donzelles. I comminche à sgratter s'panche pi s'tête.
"Bin m'vlo arringé ki dit, dja qu'aveuc el mienne ches du grabuche, fo ti po qu'jmin arrinche avecque deuze"
"J'relinche eud 3 foués del miche et ch'coeup lo, a vo fouère des misères"
Tertous yz couchtent jusqu'o arrive ach dépendeu d'andoulle Mimile. Y prin sé grinds airs avé sin capieu sus tête ( il l'o acaté dpuis qu'il o rebayé ch'Woerd Potcher Teur avé ch'Patrick, y'sprind pour Ch'Kris Fergusson, ki am'navis doit avouére edz'akchions dins l'usine ed tracteurs, ché mis possib autremint).
Ch'mimille i dit: Ben mi j'surrelinche du doub ed'ti
Cafougnette; Té malad ou koi? T'é tché su l'tête o matin?
ChMimile y dit rin. El tchiote blind el groche y mucktent leu cartes.
Cafougnette: Ti vo n'avouére du mo, ché mi qui tel dit...m'en allons t'remonté tes preunes. Ti cro ecque je t'vo mi v' nir aveuc tes gros chabots.Ti mint cam'm' in arracheux d'dints !
J'tsursurelinche tin tapis. Aveuc l'main qu'jo, tu vo braire toute el s'maine et tu pourros pu et'souler ch'groin pendaint trois moués
Ch'mimile y'dvint tout rouche (m'enfin fachon dire coz il etoué dja bin rouche , c'est mi un chucheux eud' glache . Y r'tire sés leunettes et rebaye ch'Cafougnette droit din ches zieux.
Ch'Mimile: Chés ti l'pichon, m'en vo t'vider tés poques
Cafougnette: Alors pourquoi ti m'relucke comm eune glenne qui ramache un coutieu!
ChMimile: Je foués All-in
Cafougnette: Qu'oiche tu baves? A vo mi rin dire Ollinn.
ChMimile: Ti comprind rin ach jeu lo. A vo dire que'j foué tapis. Ches commo ki distent en Amerlique.
Cafougnette: Tu't 'prind coère pour ch'l' amerloque, ech' Bon Diu sin surnom.
ChMimile: c'est sin fils , Jesus. t'es vraimint eune doudouche, in Nig'doulle, in Nonoche .Tu vos vire qu'in j'iro achés Woerd Cherries et qu'tu m'verros ach'poste.
Cafougnette: Et ti in Babache, in Imblaieux, in Biec-Bos..
ChMimile:Sauret d'étalache, Zouafe, Biafou, Crignu...
Cafougnette: Déloqu'té, Huberlu, Manoqueux, Quervé, Branque ed'thym...
Cho pourroué continuer ainchi tout el nuit... mais l'zotes y demindent a vire chés jeux...
Cafougnette y foué vire ches Donzelles...
Ch'Mimile y prind sin air d'en avouère troués... et r'teurne eune paire ed Ros...
Ch'Mimile: Qoiché qu'tu vo faouère face à min King-Kong? en rigolant comm eune grosse vaque...
Cafougnette: Kesk'eune gueunon vint fouère lo. Chés mi qu'ti traite ed gueurille?.J'te foutrai bin m'main sut gueul epeutnard 'ed'gardin...
ChMimlie:Ch'ti qui m'cassera l'gueule n'est pas incor né et sin père i est mort !
Y sont prés a s'agrippés comm des chiffonnières
Vlo aute coze... maintenant equ'z'esprits sont bin equeuffés, y sont oblidgés d'les calmés sinon y vo avouère du chin pertout.
Ch'patron l'estaminet y seurte eune boutinche et annonce que c'est sin tournée...Rin d'tel pour mette tout l' monde d'accoeurd...
Ch'est le momint deul flop...Tout l'minde ertint sin souff...Z'on pourroué intindre un cot peuter...
A A 7
L’tension est a son comb. Ch’Mimile y s’marre comme un dératé et Cafougnette y mouk sin nez. On d’minde a ch’warde-champet d’allo querre touch’villache, pi même ch’maire et ch’curé. Y veultent mêm sonner ch’tocsin…
On n’o mi point erteurné ch’Turn, qu’sa bouscule pour rintrer dins ch’lestaminet.
Ch’ binocleux, el’ sincier, ch’cacheux d’topes, ch’galloneux pi ch’fumaqueux d’anguil, pi z’eutes, ch’rebouteux, l’étripeux et aut’s éclopés, berzoulleux, pequeux du diminche, chés rafileux, bref tertous…Même chés femmes all arrivtent aveuc leurs mioches , chés nazus, chés brayous. On ‘s croiro al ducasse. Perchonne y comprind rin mais ché mi grav.. ; a foué l’animation.
Ch’Turn ,cha noué un 9
Ch’Mimile intamme eune danche : M’in vo t’pleumer. Quin j’vo al pèque , j’ramène du pichon
Cafougnette : tourne tin cul au vint, t'aras d'l'air. Alle donzelle vo v’nir al rivièr, t’auro un bieu couep d’martiau chu’tête
On’cminche a fouère des paris, as’insulter, a’sdonner des coeups coudes, as’fouère des grimaches. Y foué reudmint co qu’on d’minde à chucher, a sortir chés cruchons , chés verres et chés flacons…Tertous y’s rincent l’gousier, et a quinter des canchons. Ché mi croyab cho…Et ch’curé qui foué sin sermon comme coué ch’jeu lo, ché un jeu du Diap…Allé, sieur Curé, rhabile tin tchiot, y vo prenne fro…
Pi vlo ch’momint du suspinse… S’en allon erteurner l’rivière….On ferme sin clapet, redreche sin dos pour vir odssus l’mélée, ertint sin rot ou sin pet pour mi briser le momint solleunell.
Y o d’éléctricité din l’air, cha sint l’orache…
On erteurne eune Donzelle ! ! ! ! Il o eune branle ed Donzelles ! ! !
Ché ch’délire. Ch’Mimile qu’éto prét a sieuter chu tab, eus’gueule all vo tchère par terre.
Ah sacré Cafougnette, y tomberot dins l'rivière, qu'i remonterot coère aveuc du pichon dins s'poque…
Pi d’un coeup ch’Mimile y’sint pu , y sieute pard’ssus l’tab et attrape Cafougnette par sin gousier…et s’in vo tous les deuzes a rouler sur l’sol… El’zeutes en profitent, ché l’badjarre générale….On se cougne, s’étripe, s’écartelle et s’impogne :
- Morz’y s’n’oeul ….Brake z’y s’gambe…. Tire z’y ses preunes… Tord z’y s’n’orelle….Saque lui s’panche….
Ca volte ed tous les cotés…cho roulte, déroulte, déguenille et s’écharpie. Pi ca s’déboite , erboite, décollte et s’trucide… T’in vo ? ben tu n’auro coère…
-Maque z’y sin blaire….Arrach’ ses cavieux pi ches dints…Démintibule eus’gueule….Latte z’y sin tchu….Ernoue chés boyeux…
Ah par ichi , z ‘o savons rire , y’o mi doutes…Même ch’curé sin melte, un vrai diape…Ons croiro a chés quintonnales après ch’depouillemint…
Pi ch’warde-champet y crie 22 ! ! ! !
Lo, cho rigolte pu… Tertous s’ramachent, s’levtent tant bin qu’mo, s’refagotent comm’ y peut… Cho clopine, tingue et titube , supporte l’in l’ot, y’o des macarrons, des bros a mitan tordus, des dos d’travers, des gueules qui pindent, des zeuilles ki déberluqutent…Ché pire que Wattrelos…
L’camionnette est lo sul plache et ch’brigadier y finit par rintrer aveuc ches carbiniers …
- Koiche qui s’passe ichi ? Z’avons erçus un coeu d’fil … Y’auro du grabuche qui disouettent…
Cafougnette : Chés rin mon captain’, zo fetons juste el victouère chés franchouillards sur z’Otes Blaques ( Cafougnette ché t’in malin, y savo qu’ech’brigadier, il éto in ancien reuguebimane)
- Mais ch’étoué l’s’maine dernère ki dit l’brigadier
- Ouais ché seur, mais des victouère commo, in n’in vo mi tous les jours. Alors a vo bin un tchiot coeu a bouère, non ?
Yo des argumints, on peut mi allé cont’. Ch’brigadier il o finit comme zeutes a ch’comptoir à siroter du jaune , du rouche pi apres d’ot’ couleurs qui n’sont point din ch’manuel.
Commint cho continue… j’nsais mi… tout qu’ej ‘sais , ché l’cabartier il o finit par nous ramner a nos maisons sur eune brouette. Jcro bin qu’il o eu du mo a ses bros autint qu’mi j’ai eu du mo a m’tête…
